Transcription of V-H,28

V H 28

V H 28 PLUTARCH. de Alex. M. fort. aut virt. II 3 p. 336 C-D:
ὁ μὲν οὖν Κράτης ἰδὼν χρυσῆν εἰκόνα Φρύνης τῆς ἑταίρας ἑστῶσαν ἐν Δελφοῖς ἀνέκραγεν, ὅτι τοῦτο τῆς τῶν Ἑλλήνων ἀκρασίας τρόπαιον ἕστηκε. [= STOB. III 6, 46; MAXIM. XXVII 29]. cf. CLEM. ALEX. paedag. III, III 21, 4.
PLUTARCH. de Pyth. oracul. 15 p. 401 A:
καὶ ὁ Σαραπίων "τί δὲ ταῦτ'" ἔφη "μακάριε, δυσχεραίνεις; ἐκεῖ βλέψον ἄνω καὶ τὴν χρυσῆν ἐν τοῖς στρατηγοῖς καὶ βασιλεῦσι θέασαι Μνησαρέτην, ἣν Κράτης εἶπε τῆς τῶν Ἑλλήνων ἀκρασίας ἀνακεῖσθαι τρόπαιον." ἰδὼν οὖν ὁ νεανίας "εἶτ' οὐ περὶ Φρύνης" ἔφη "τοῦτ' ἦν εἰρημένον τῷ Κράτητι;" "ναί" εἶπεν ὁ Σαραπίων˙ "Μνησαρέτη γὰρ ἐκαλεῖτο, τὴν δὲ Φρύνην ἐπίκλησιν ἔσχε διὰ τὴν ὠχρότητα.
ATHEN. XIII 591 B:
αὐτῆς δὲ τῆς Φρύνης οἱ περικτίονες ἀνδριάντα ποιήσαντες ἀνέθηκαν ἐν Δελφοῖς χρύσεον ἐπὶ κίονος Πεντελικοῦ˙ κατεσκεύασε δ' αὐτὸν Πραξιτέλης. ὃν καὶ θεασάμενος Κράτης ὁ κυνικὸς ἔφη τῆς τῶν Ἑλλήνων ἀκρασίας ἀνάθημα. cf. AELIAN. var. hist. IX 32.
SYRIAN., SOPATR., MARCELL. schol. ad Hermog. status IV p. 118, 12 in appar. Walz.:
ἀναθέντων Ἑλλήνων ἐν Δηλφοῖς αὐτῆς καὶ ἐπιγραψάντων, Φρύνη Ἐπικλέους Θεσπική, Κράτης ὁ κύων ὑπέγραψεν, ἐκ τῆς τῶν Ἑλλήνων ἀκρασίας.